[1808]

Besitzt keine vertrauenswürdigen Nachrichten vom Krieg mit den Türken oder unter den Fürsten, erwartet gespannt Nachrichten von einer Übereinkunft zwischen Kaiser [Karl V.] und [König Franz I.], nachdem 4'000 Eidgenossen dahingemetzelt worden sein sollen; auch aus Augsburg kam noch keine Nachricht. Bullinger soll für Frieden beten. Grüße, besonders an [Diethelm] und [Jakob] Röist.

S. Dispeream vero, Bullingere, si quicquam nunc aliquamdiu habui, quod de bellorum alea vel nostrorum cum Turco 1 vel inter se nostrorum principum certum ad te perscribere potuerim. Scriptum iam satis diu nihil de iis rebus est a fide dignis hominibus; rumores vero sic variant, ut meminisse horum pigeat. Expectant nostri in horas certum nuncium, ut inter caesarem ² et Gallum ³ conventum sit, si tamen conventum est, quod affirmare plaerique audent post trucidatos quater mille Helvetios, cuius rei non dubito, quin istic

veriora testimonia a habeatis. ⁴ Augustani mei nihil horum in suis literis commemorant 5 , qui explorata solum scribere ad me solent; si quid mihi significatum fuerit, diligenter, ut ipse quoque quamprimum resciscas, curavero.

Commenda nos domino diligenter, ut sua pace hic nos et aeternum dignetur.

Saluta totam tuam domum cum verbi gratiae praeconibus omnibusque amicis. Dominum Röstium ⁶ , consulem vestrum, integerrimum et optimum virum, cum se digno filio ⁷ meis verbis amantissime salvere iubebis. Salutem tibi dicunt nostri omnes. Ora pro nobis, mi charissime et optime frater, et crebris tuis piisque intercessionibus apud dominum diligenter nobis patrocinare, ut humanis omnibus rebus magno impetu quotidie in praeceps ruentibus spes nostra et infracta in dominum Iesum fiducia b se ipsa subinde c fortior assurgat suaque virtus in nostra infirmitate feliciter perficiatur. Vale, decus meum, ⁸ in domino.

30. octobris 1543.

Tuus Ambr. Bl.

[Adresse auf der Rückseite:] Observando suo et charissimo Bullingero. Zürich.