[1353]

Obschon sie sich nicht persönlich kennen, ist ihm Bullinger durch sein Schrifttum, das die reine Lehre Christi meisterlich vermittelt, nahe gekommen. Empfiehlt einen frommen Engländer [...], der in den drei klassischen Sprachen einigermaßen bewandert ist und einmal in seiner Heimat zu lehren beabsichtigt; dieser möchte einige Monate in Zürich studieren und als Privatlehrer tätig sein.

Iesus Christus a .

Gratiam et pacem in Christo Ihesu, deo ac servatore nostro.

Licet iuxta externum hominem tu mihi et ego tibi, Bullingere integerrime, ignotus sim, tamen iuxta internam conversationem verae vitae et purae doctrinae mihi iam admodum familiariter a multis annis notus es b . Utor enim tua opera tuoque ministerio in enarrandis plerumque sacris literis. Audio crebro te magistrum mihi per libros loquentem, et in te Christum ipsum audio. Ea vis est purae doctrinae, quae ex fonte veritatis, quae Christus est, scaturit, ut etiam ignotissimos et magnis locorum spatiis dissitos, arctissimis christianae charitatis vinculis copulet et quodam modo uniat.

Haec cum ita se habeant, scio te in optimam partem interpretaturum, quod sanctis tuis laboribus tantisper obstrepam, dum harum literarum exhibitorem 1 tibi commendem. Est, ut paucis dicam, natione Britannus, verae religionis studiosissimus, peregrinatur autem non ad ostentationem inanem, sed ut discat ea, quae postea apud suos doceat. Cupit enim esse vas utile in domo domini ² . Tres praecipuas linguas degustavit satis foeliciter. Audivit autem apud vos vigere sacrarum literarum studium, servata certa praecipuarum linguarum enarratione. Quare aliquot mensibus isthic moran cupit, ut discat, quae in se desiderat. Hinc oro dilectionem tuam, ut eum benigne, ut soles huiusmodi bonos viros, excipias, et ne cuiquam gravis sit, impetres ei aliquam conditionem docendi privatim ditiorum aliquot vestrae urbis civium liberos. Caetera ex ipso audies. Versatus est hic aliquandiu honeste ac frugaliter. Quicquid ergo huic beneficiorum impenderis, ipsi Ihesu Christo te impendisse non ignoras.

Si ego vicissim tibi tuisve quapiam in re servire potero, en offero me tibi servum ac fratrem in Christo obsequentissimum. Commendabis me sanctis

orationibus symmistarum et fratrum tuorum, nominatim d. Pellicani, Leonis Iudae, Bibliandri, Megandri etc. Bene vale.

Datae Marburgi, 29. ianuarii 1540.

Toto pectore ³ tibi addictissimus

Gerardus Geldenhaurius Noviomagus.

[Adresse auf der Rückseite:] Pietate eruditioneque praestantissimo viro, d. Henrico Bullingero, Tigurinae ecclesiae doctori ac pastori vigilantissimo, domino et praeceptori unice observando. Zurych.