Berichtet über den neuen Knonauer Landvogt [Leonhard Holzhalb], der sich bei den Pfarrern der Vogtei gut eingeführt hat. Bittet Bullinger, er möge Holzhalbs reformierte Haltung mit einem Brief unterstützen, und versichert ihn der Treue.

Gratia et pax Christi tecum. Frommer, getrüwer, lieber M. Heinrich.

Ich laß üch wüssen von unsers nüwen vogts ² zu Cnonow wägen, das wir nit anderst könnend verston, dann das er sich wol und rächt understadt ze halten. Er hatt sich früntlich und gutwillig gegen uns erbotten und insonders mit uns, nammlich mit dem von Rifferschwil ³ , Mettmenstetten ⁴ , Cnonow ⁵ und mit mir, geredt und verheissen, er welli daran sin, das m[iner] herren mandata gehalten, die laster gestraft werdind, und er welli uns dapfer und trülich ruggen halten. Und sin erbieten, läben und wandel nach bißhar gevalt uns warlich nit übel. Wir versähend uns alles guten zu imm und hoffend, das ir ouch nüt dann trüw und dapferkeit von imm werdind hören. Darumb wäri also unser beger und früntlich bitt zu üch, das ir ouch ettwa, wenn ir so vil wyl hettind und es üch wil gevallen, ein früntlich zuschriben und ermanung zu imm thätind ⁶ , damit der man ouch dester trülicher fürfuri, wie er sich gegen uns und susti ⁷ erzeigt hett. Und wir, so vil mir vermögend, wend ouch für und für hie imm ampt ⁸ trülich leeren und läben nach üwerem bevelch. Versähend üch aller trüw und dapferkeit zu uns. Hiemit sy got mit sinen gnaden alle zit mit üch.

Datum 10. die aprilis anno etc. 33.

Mit herren prior von Cappel ⁹ hatt er insonders geredt ouch. Item so handlet er gegen demm frommen Heinrichen 10 zu Affholteren 11 ouch trülich etc.

Heinrich Pfiffer,

diener der kuchen zu Maschwanden,

üwer williger.

[Adresse auf der Rückseite:] Dem frommen, christenlichen, trüwen, wolgelerten M. Heinrichen Bullinger, predicanten Zurich, sinem lieben herren.