Kehrte am 26. August nach Konstanz zurück; wurde von Herzog [Ulrich von]Württemberg in Gnaden, jedoch mit schäbiger Bezahlung entlassen und bittet Bullinger, Gerüchten, wonach er im Zorn weggeschickt worden sei, entgegenzutreten; hofft auf eine spätere, großzügigere Abgeltung durch den Herzog. Grüße.

Salve, mi venerande et optime Bullingere.

Constantiam nuper, hoc est 26. augusti, cum bona Wirtempergensis principis 1 gratia redii, nisi quod ille malignius aequo mihi numeravit; nam tantum non 300 aureorum iacturam feci toto illo quadriennio, quo in ipsius ditione non ferendorum laborum molestia oppressus prorsumque enectus sum. Et tamen gratias ago deo meo, quod bona conscientia illinc explicitus iam meis restituor. Volui autem, licet occupatissimus, istuc tibi paucis indicare, quod sciam, quid amicorum meorum rumusculi iactitent, nempe irato me principe missum factum, ne desit, quod illis obiicias; nam quicquid hic peccavit princeps, non pro ira, sed pro consuetudine fecit ² . Sic enim solet. Spero autem fore, ut olim per commodam aliquam occasionem, quod nunc desidero, benigne compenset et dignam principe munificentiam exerat, quum sit in me alioqui non iniquo animo.

Commenda me clarissimis viris Pellicano, Leoni ³ , Theodoro ⁴ ac caeteris fratribus et amicis, quorum me precibus tuis quoque additis apud Christum iuvari vehementer cupio. Salutant te Zviccii ⁵ cum germano meo fratre ⁶ et sorore ⁷ . Bene vale, mi plus quam charissime et optime frater.

Constantiae, ultima augusti anno 1538.

Tuus Ambrosius Blaurerus.

[Adresse auf der Rückseite:] Clarissimo viro d. Heinricho Bullingero, Tiguricensis ecclesiae episcopo, domino et fratri observando atque charissimo etc.